L grup nominal feminin

Pruma lezion

Indesc di contegnus dla pruma lezion:

Indroduzion - l grup nominal feminin
1. L articul
2. Les preposizions articoledes
3. La formazion dl feminin
4. L plural
5. La concordanza tl grup nominal feminin plural
Grafia 1. Regoles de basa: i mudamenc grafics anter ls y i idioms

L grup nominal feminin
l articul y les preposizions - la formazion dla forma feminina y l plural - la concordanza

Liejede l test che vegn do y fajedeves n pensier sun les valivanzes o sun les desferenzies a confront con vost idiom.

Al é vegnù l ann nuef, l 2002

Euroforia y Europafilia

Nuet de San Salvester de festa: per 300 milions de abitanc te dodesc stac da la Scandinavia a la Grecia àl metù man na era nueva con na moneida unitara.

Ence per i Ladins dles Dolomites é chisc dis l argoment prinzipal na valuta monetara, l Euro. Ala é nueva tla forma lutra y vel con Nanuef 2002 soura i confins nazionai fora, te dodesc stac. Do l concordat de Schengen che à tout ju i controi sun les frontieres statales internes dla UE é sen l Tirol Storich cresciù adum de n jouf emplù con la introduzion dl Euro tla Talia y tl'Austria.

endò al indesc dla pruma lezion

1. L articul

La Scandinavia y la Grecia à metù man na era nueva con la medema moneida.
Les frontieres é vegnudes toutes ju do l concordat de Schengen.

	*determinatif*	*indeterminatif*	*ejempli*
sg.f.	la (l')	na (n')	la berba, la man, l'agajon, l'aria na vacia, na ciasa, n'aucia, n'abitanta
pl.f.	les		les ciases, les mutans, les orazions, les enciaries

Met averda!

Datrai mantegn paroles feminines che met man con vocal o con combinazions vocaliches desche ua-, ou- y iu- l articul entier p.ej.: la oma, la ua, la ousc, la outa, la Iugoslavia y e.i.
L plural dl articul indeterminatif mancia. Na sort de plural pòn formé con agetifs cuantificatifs, p.ej. deplù ciases, n valgunes eles.

endò al indesc dla pruma lezion

2. Les preposizions articoledes

Dodesc stac dl'Europa à la medema moneida.
Ala é nueva tla forma lutra y vel con Nanuef 2002.

L articul determinatif feminin pò se lié con te y de te na preposizion articoleda.

		f.sg.	f.pl.	Ejempli
de	+ art.	tla (tl')	tles	Ester tla meseria;
te	+ art.	dla (dl')	dles	Se enteressé dla storia y dles conties da zacan

La preposizion y l articul indeterminatif endere ne vegn mai tachés adum, p.ej. ciapé n ciof da na muta.

Les autres preposizions feminines ne vegn nia scrites liedes al articul, p.ej.:

		f.sg.	f.pl.	Ejempli
a	+ art.	a la	a les	Jì a la festa; ti dé l biliet a les cassieres
da		da la (da l')	da les	Ruvé da la una y s'en jì da les trei
sa		sa la (sa l')	sa les	Jì a pe sa la Plief
ta		ta la (ta l')	ta les	Jì enchin ta les ultimes ciases dla vila
con		con la (l')	con les	Con la roda; con les mutans a la festa
per		per la (l')	per les	Crema per la pel secia y per les mans da cretes
sun		sun la (l')	sun les	Sun la luna y sun les pizes dolomitiches

endò al indesc dla pruma lezion

Eserzize (1.1) - Emplenide i vuec con articui y preposizions che passeneia.
… giorneda storica, … unité europeica, … festa popolara, … cherta de credit, … ultima mesanuet, … valuta … zedoles dl Euro, … seconda vera mondiala, … pruma colaborazion economica, … nazions … Europa, … provinzies … Talia.

Eserzize (1.2) - Metede adum 9 conzec con les paroles che vegn do les lian adum con articui o preposizions adatés.
Oma, mans, unitara, festa, Europa jormana, nazions, introduzion, davertes, mere, giava, moneida, fenestres, Roma dodesc, depentes, ciasa, paussa, universités, ondles..

Istruzions per fé i eserzizes:
scrive l test, les traduzions o les respostes a les domandes al professour tres e-mail: redazion@noeles.net
Per mané ite plu saurì al professour i eserzizes ves aconsionse de selezioné empruma l test dl eserzize y de l copié ite tla e-mail (ctrl-c "copié" y ctrl- v "enjonté") y de completé ilò l eserzize. Recordedeves de dé dant l numer dl eserzize tl cheder "oget"!

endò al indesc dla pruma lezion

3. La formazion dl feminin

Sistem monetar valuta monetara
Confin nazional seida nazionala
Argoment prinzipal forma prinzipala

Sciche regola de basa per la formazion dl feminin sie de inoms che de agetifs vélel:

feminin = mascolin + -a

Ejempli de inoms:
cian - ciana, ciaval - ciavala, diretour - diretoura, …

Ejempli de agetifs:
sclet - scleta, monetar - monetara, madur - madura, golous - golousa, bon - bona, cuecen - cuecena, …

Met averda!

Pro na pert de paroles ciaponse l'alternanza consonant sonour (tl feminin) / consonant sourt (tl mascolin) sciche p. ej. louva- louf, goba - gop, sourda - sourt, grieva - grief, grija - grisc -, mesa - mez).
Les paroles arpedes che se ruva con n consonant palatal tl feminin muda chest consonant palatal te n consonant velar (fem. sg. -cia / -gia; -scia > -ch; -sch; p.ej. blancia - blanch; lergia - lerch; foscia- fosch; todescia - todesch)

Paroles sourantoutes plu tert mantegn endere l medem consonant sibe al mascolin che al feminin, p.e. grotesch - grotesca, gotich - gotica.

Chisc doi fenomens é conescius ence ti idioms.

La regola generala f. = m. + -a ne vel nia ti caji reportés tla tabela sotite:

Mascolin	Feminin	Ejempli
-o (nia tonich)	-a	scerio - sceria, bravo - brava
-e (nia tonich)	-ia	tiebe - tiebia, spave - spavia, grove - grovia Ezezions: puere - puera, rie - ria
-'er (nia tonich) (-'ber, -'der, -'fer, -'gher, -'per, -'ter, -'ver)	-ra (-bra, -dra, -fra, -gra, -pra, -tra, -vra)	slaber - slabra, tender - tendra, auter - autra iagher - iagra, incomper - incompra
partizips passés -é -ì -ù	-eda -ida -uda	enjigné - enjigneda, spaché - spacheda saurì - saurida, emplenì - emplenida sconù - sconuda, perdù - perduda

endò al indesc dla pruma lezion

Eserzize(1.3) - Formede la forma mascolina pian demez da chela feminina.

feminin	masculin	feminin	masculin
Nueva		Ladina
Monetara		Prinzipala
Storica		Smarida
Liegra		Grovia
Lutra		Ferbra
Abitanta		Entenuda
Santa		Soladiva
Nazionala		Cianteda

Istruzions per fé i eserzizes:
scrive l test, les traduzions o les respostes a les domandes al professour tres e-mail: redazion@noeles.net
Per mané ite plu saurì al professour i eserzizes ves aconsionse de selezioné empruma l test dl eserzize y de l copié ite tla e-mail (ctrl-c "copié" y ctrl- v "enjonté") y de completé ilò l eserzize. Recordedeves de dé dant l numer dl eserzize tl cheder "oget"!

4. L plural

La nueva moneida vel sourafora les seides nazionales.

L plural dles paroles feminines vegn fat con les desinenzes -es o -s co che an veid tla tabela che vegn do.

Singolar Paroles che va fora con …	Plural … fej l plural con	Ejempli
-a -e	-es	roda - rodes, ortia - orties bela - beles, dura - dures lege - leges
vocal tonich	-s	virtù - virtus, verité - verités
consonant (tout fora -f, -n, -sc)	+ es	volp - volpes, pert - pertes, nuet - nuetes fauc - fauces, pel - peles
-f	-ves	sief - sieves
-sc	-jes	crousc - croujes, ousc - oujes, raisc - raijes
-n	+ s	majon - majons, man - mans

Met averda!

Les paroles che vegn scrites tl singolar con -ì, -ò, -ù azentés perd l azent tl plural.
Les paroles forestes o nia dldut assimiledes pò avei n plural che ti va do a chel dl lingaz de origina.
Chestes cater paroles forma n plural particolar: fena > fenans, muta > mutans, oma > omans, sor > sorans.

Dlongia fena, fenans él ence les formes regolares femena, femenes.

La grafia muda, ma la pronunzia resta unfat pro:

-cia / -ces
-scia / -sces
-gia / -ghes
-ca /-ches
-ga / -ghes
-sa / -sses

brocia - broces
fascia - fasces
lingia - linges
perdica - perdiches
lenga - lenghes
tos - tosses

Les paroles che fenesc con -f y -sc muda tl plural l consonant final te -v- y -j- (clef > cleves, crousc > croujes).

endò al indesc dla pruma lezion

Eserzize (1.4) - Fajede l plural dles paroles che vegn do.

singular	plural
moneida
banca
curiosité
zedola
nazion
vera
nuet
plief
agajon
tribù
zité
colaborazion
grossa
acia

endò al indesc dla pruma lezion

5. La concordanza tl grup nominal feminin plural

L concordat de Schengen à tout ju i controi sun les frontieres statales internes dla UE.

La concordanza tl grup nominal plural feminin mostra ti idioms ladins comportamenc plutost desvalifs; na casistica dret scempla vegn mostreda chilò sotite sciche ejempl:

Ghe: la valenta mutans	o la mutans valentes
Bad: les prosses mutans	o les mutans prosses
Fas: la valenta touses	o la touses valentes
Fas (brach): le valente touse	o le touse valente
Fod: le touse valente	o le valente touse
Amp: la varenta toses	o ra tosa varentes

L ladin standard à sourantout sciche model chel dla val Badia, de Fodom y dla val de Fascia de Sot (brach) che preveid duc i elemenc plurai marscés y sciche merscia chela plu tipica y adoreda, -es,

LS:
Les mutans valentes o les valentes mutans
Les gliejies vedles o les vedles gliejies
Les ciases depentes
Les sorices dutes grijes ma ence les sorices dutes grijes

La regola vel ence can che inoms o agetifs é liés te n predicat nominal, p. ej.
LS:
Les vaces plu vedles é dutes te stala.
Les fenestres é daurides y dutes netes.
Les mans é grovies ma beles netes.

L verb dl di: "ester" al prejent

Ie son
Tu ies
Ela - el é
Nos son
Vos seis
Eles - Ei é
An é

Eserzize (1.5) - Traslatede i curc tesc' che vegn do con l aiut dl vocabolar

test original	traduzion per LS
Le belle chiese della città sono chiuse.
Le monete nuove sono lucenti.
La cugina di Piero é tedesca.
Tu sei di Madrid.
Le barche sono sulla spiaggia.
Voi siete alla festa tutte sole.
Io sono italiana.
Noi siamo vecchie ma sane.

endò al indesc dla pruma lezion

Grafia 1. Regoles de basa: i mudamenc grafics anter ls i idioms

Sciche i eis podù ves anadé da cie che i on scrit enchin a sen é la grafia dl ladin standard scialdi saurida. En general ti vàla do a la grafia unificheda ladina en doura dal 1987 con n valgunes scemplificazions per cie che reverda la azentazion y i grafems con segns diacritics.
Tles tabeles dessot végnel reporté i mudamenc grafics plu emportanc y regolars anter idioms y standard.

Idiom		Standard	Ejempli
Fascian
ö (moenat) – föch	>	ue - fuech	puech, luech, ruesa, uef, fajuel
ß - sal		s - sal	sabla,
Gherdeina
ë - ajëi	>	e - ajei	seit, beive, ajei
	>	-n inn, ossigenn	in, ossigen Ezezions: ann, dann, senn
ß - sabla	>	s - sabla	den
Val Badia
ë - sëch ê -	>	e sech mesc	trei, trecia, todesch pesc
ö -föia bröm	>	ue - fueia u - brum	cuer, vuet su, cura
ü - dür	>	u - dur ue - puech, puere	sut, ua, such fuech, luech, juech
ç - çiamò	>	c - ciamò	ciaval, studenc
-nn a la fin dla parola	>	-n el intenn, toronn	el enten, toron Ezezions: ann, dann, senn
ß - ßabla	>	s - sabla	sen
L "ö" à ejic desvalifs y per chel végnel consié de pariglé l comportament di autri idioms o de cialé do tl dizionar. Emplù ne végnel nia desferenzié anter vocai lonc y vocai curc.
Fodom
ë - sëch	>	-e- sech	vert,
â / à - ciân, ciàn	>	-a- cian	man, sanch, pan
-nn - sonn	>	-n son	peten

Ampez
s - sal		s - sal
S - Stua		s + cons. stua sci + a, o, u sciala sc + i, e scimia	sté, stome, sciofer scina
-np- Anpezo -nb-		-mp-, -mb- Ampez

La pronunzia resta medema sciche ala é tl idiom de val.
Cfr ence WL pl. 25

endò al indesc dla pruma lezion